Anonymous հաքերային խմբավորումը սկսում է «Հայոց ցեղասպանություն նախաձեռնություն» (Operation Armenian Genocide) գործողությունների շարքն ընդդեմ թուրքական իշխանությունների:
Youtube-ում Anonymous-ի կողմից տարածած պաշտոնական տեսանյութում հայտնի խմբավորման անդամները հայտարարում են, որ հունվարի 25-ը հայտարարվում է նախաձեռնության սկիզբը: Anonymous-ը կոչ է անում Թուրքիայի իշխանություններին ճանաչել Հայոց ցեղասպանությունն ու պատասխանատվություն կրել իրենց գործած դաժանությունների համար: Հաղորդում է «Արմենպրեսը»:
«1915 թվականին Թուրքիան սպանել է ավելի քան 1,5 միլիոն հայերի, ինչպես նաև հայ ժողովրդին զրկել սեփական պատմական հայրենիքից: Թուրքիան պարտավոր է հատուցել սեփական քայլերի համար: Մենք պատժելու ենք թուրքական իշխանություններին, մինչև նրանք չընդունեն Հայոց ցեղասպանության փաստը: Շատերը հնարավոր է` չգիտեն Հայոց ցեղասպանության մասին, սակայն լսել են հրեաների Հոլոքոստի մասին: Ինչպես Հոլոքոստի դեպքում Գերմանիան ընդունեց սեփական մեղքն ու առ այսօր հատուցում է, այդպես էլ պետք է անի Թուրքիան: Այս կոչն ուղղված է նաև այլ պետություններին, ովքեր դեռևս չեն ճանաչել Հայոց ցեղասպանությունը»,- ասվում է հայտարարության մեջ, որն ավարտվում է սպառնալիքով` ուղղված ընդդեմ Թուրքիայի. «Սպասեք մեզ»»:
